故仔：蔡師奶
做師奶，老公賺果份又唔夠洗，個細路又細要照顧，又唔係讀好多書，咁即係時間唔穩定，但又等錢洗，咁會搵到啲咩工呢？就哽係唔謊係薪高糧準福利好啦！所以，炒散，就係我地嘅選擇，亦可以話，唔係一種選擇。炒散真係見盡人生百態，等我蔡師奶係到教精大家，無咁易俾人搵笨！
之二：九月中問你十一月番唔番工，咁係咪十月期間當炒魷？
你知啦，promoter呢行，話就話炒散啫，其實好多人都符合所謂長工的418要求（即係連續四周為同一老闆打工，每周至少18小時），查實係有晒大假年假果啲福利。
咁啲老細呢，就哽係鐘意扮傻啦。話說我有個姐妹，做開推廣員。佢老細，見佢一路番緊418，於是，就扮哂嘢喎，九月中時，走去問佢十一月番唔番工，扮哂佢係散工咁問佢。咁我姐妹就好醒，就直接問：咁你係咪即係十月會炒我，當十一月又請番我咁？
查實呢，咁的情況，老細真係咁玩野，佢係要俾遣散費你架，因為你合乎418嘛！